Kaszëbsczi Linux ë Ôpen Ùdbë : linuxcsb.org

Henri Richard, wiceprezydent AMD - firmë, chtërna produkùjë grafikòwi kôrtë ATI - na kònferencëji Red Hat Summit ògłosëł, że jegò firma mô dbã, bë wëdac ôpen czérowniczi do 3D kôrt swòji produkcëji.

Jakno mòże sã domëslëc, pòtkało sã to z wiôldżim aplauzã zalë. Dodôł téż, że dlô AMD chce téż zmienic swój pòzdrzatk na wespółrobòtã z linuksową spòlëzną. Jednegò równak zafelowało - nie pòdôł niżódny deklaracëji czedë ne czerowniczi bë bëłë przistãpny dlô brëkòwników. Në, nót je mést jesz pòżdac na barżi kòmpòtentné infòrmacëje.

Czekawé je, jak na to wszëtkò zareagùjë nôwikszi kònkùrent AMD na rënkù grafikòwich kôrt - Nvidia? Jak narô dôwô nôlepszé wspiarce, le co je problemã dlô wielu brëkòwników ë deweloperów Linuksa czerowniczi wëdowóné bez Nvidiã nie są ôpenzdrojowé.

Zdrój: http://enterpriselinuxlog.blogs.techtarget.com

Terô nie le blós Kaszëbi czë Pòlôchë bãdą mògle dowiedzëc sã ò kaszëbsczim linukse, bò ùprzistãpnionô òsta do zladënkù anielskòjãzëkòwô wersëja 8 numeru Dragonia Magazine, w jaczim znôwa nalezc mòże wiadło ò najim dolmaczënkù.

Króm tegò artikla, są wszëtczé jaczé pòjôwiłë sã w pòlsczi wersëji. Le jednô sprawa jô bë zmienił - w przëtrôfkù niechtërnëch artiklów òbrôzczi bë mògłë bëc w anielskòjãzëkòwi wersëji a nie pò pòlskù. Chòc mëszlã, że to mòże taczé le szëkanié dzurë - pò prôwdzë to bëlny cządnik ë wôrt pòswiãc mù pôrã gòdzënów na czëtanié.

Fejn, że prawie dzãka taczim artiklom w różnëch dzélach swiata mòże ùczëc ò kaszëbiznie ë kaszëbsczich ùdbach.

Zladëjë numer: http://dragonia.pl/request.php?14

Japòńskô to jeden z nôbarżi bòkadnëch krôjów na swiece, le téż rozmie jak nie tracëc swòjëch dëtków. Japòńsczé Ministerstwò Ekònomiji, Hańdlu ë Industrëji mô dbã wprowadzëc Linuksa do szkòłów. Mô òn zastąpic systemë Windows 98/ME, jaczé nie mają ju wspiarca òd Microsoftu.

Wedle Ministerstwa je to kòle 400 tësąców kòmpùtrów - wëmiana jich na nowi sprzãt ë kùpienié jesz nowich licencëjów Windowsa to za wiele dlô Japònów. Lepszim a mni kòsztownym wéńdzenim je ùżëcy dotëchczasnégò sprzãtu ë zainstalowanie na nim Linuksa. Jak narô pòd bôczënk wzãté są Knoppix, Debian ë TurboLinux, jaczé letkò jidze zainstalowac na stôrëch ë nie tak spòrich jakno “dzysdniowi” kòmpùtrach.

Slédnym czasã ùpùbliczniony òstôł klucz, jaczi ùmòżebniô òdgriwanié wikszoscë filmów HD-DVD z òminãcém wërków DRM. Wedle MPAA nen cyg cyfrów a lëterów je pòd prawną zastrzégą ë nie mòże gò nigdze pòdac.

Równoczasno MPAA dochòdzëła swòjëch prawów w spòlëznowim serwise digg.com, dze nalezc mòże wëgrzebóné bez brëkòwników Internetu jinfòrmacëje. Tam téż nalazła sã wëdowiédza ò tim kluczu, leno chùtkò òsta rëmniãtô bez robòtników serwisu. Czile dniów pózdze ùsôdzca ti starnë pòddôł sã wòlë spòlëznë ë zgòdzëł sã nie cenzurowac wpisënków zamëkającëch w se wiadło ò kluczu.

Sun ùprzistãpnił jakno Ôpen Zdroje (Open Source) wszelejaczé techniczi zôpisownëch mediów ë sprôwianiô pamiãcą. Midzë jinszëma są to czérowniczi iSCSI ë fibre channel , NFS 4.1, soft-wôra do pòwielaniô wòluminów na wszelejaczich serwerach czë rozwijowé dodôwczi do systemë sprôwianiô pòdôwkama Suna (ZFS, RAID6).

Sun chce tim kroką doprowôdzëc bë OpenSolaris stôł sã òperacjową systemą pieszegò wëbierkù dlô złożonëch systemów pamiãcë.
Wkół tich techników pamiãcë mô pòwstac całô spòlëzna.

Pòsobné pòtaknié nôléżników TLUGa (Tri-City Linux Users Group / Trzëgardowégò Karna Brëkòwników Linuksa) òdbãdze sã w Przédny Biblotece Gduńsczégò Ùniwersyteta (Gduńsk Przëmòrze) 14. łżëwkwiôta ò gòdz 11:00 a bãdze dérowac mni wicy do 14:00.

W programie m.jin. :

• ClamAV - antiwirusowô programa, òbgôdka nôwnowszi wersëji - Przemysław Hołowczyc (kòl 60 min.)
• Pyblosxom - prosti blog o czekwaich mòżnotach - Marcin Sochacki (kòl 60 min. ë tuwò ze starnë linuxcsb.org brateczné pòzdrówczi dlô Wanteda òd Kaszebë)
• Òrganizacëjné sprawë - m.jin. planë na nôblëższé pòtkania ë òbgôdka wespólny z Mariuszem Gliwińskim (Projekt GE) “majówczi”.

Wicy wëdowiédzë na domôcëch starnach TLUGa

Compiz ë jegò rozwietlenié (an. fork) Beryl przënôleżą do projektów, jaczé robią nad trzëmiarowima efektama dlô graficznëch òkrãżów Linuksa - ùsôdzając 3D desktopë. Zwadë w pòzdrzatkù na samą ùdbã doprowadzëłë przódë do òdłączeniô sã òd Compliza dzélu aùtorów ë pòwstaniô projektu Beryl. Ju czile tidzéniów nazôd szło czëc ò tim, że ne dwie linuksowé ùdbë chcą sã znôwù sparłączëc, co téż terô ju òstało pòcwierdzoné we wiadłach na starnach Compiza ë téż równoczasno na mailingòwi lësce Beryla. Za sparłączniém sã ùdbów òpòwiedzelë sã tak samò prowôdnicë (Quinn Storm z Beryla ë David Reveman z Compiza) jakno ë wikszosc wespółrobiącëch.

(wicy…)

Dolmaczënk KDE 3.5 dotëgòwôł do sztërkù czej ju mòżnô bëło zgłosëc gò do òficjalnégò wëdôwkù. Jak mòże òbaczëc na starnie KDE (nalezë henë Kashubian), nót bëło przerëchtowac 2 lopczi w 100%, to je desktop_kdelibs.po ë desktop_l10n.po, jeden lopk w 90%, kdelibs.po ë 75% wiadłów z lopków z katalogù kdebase. Terô mdzemë mielë dbã, żebë do kùńca żëcégò KDE 3.5 wëdôwk kaszëbsczégò dolmaczënkù béł wiedno aktualizowóny. Wiedno nônowszé lopczi nelezëta w Kubuntu, czim téż sã òpiekùjema. Òd terô równak wikszi cësk mdzemë dôwôlë na robòtë nad wiadłama w nowim KDE, czëlë wersëji 4.0, chtërnô jesz w tim rokù mô bëc przistãpnô do zainstalowaniô (ju mòże testowac niechtërné aplikacëje).

Open-tran.eu to nowi projekt, jaczi za dbã mô pòmòc dlô dolmaczów kòmpùtrowëch programów, chòc gwësno jeżlë dodac wicy słowiznë, téj mòże bë gò brëkòwac dlô jinech célów. Ùsôdzcą projektu je Jacek Śliwerski.

Króm fòrmùlarza na starnie, je téż mòżlewòta wësłaniô całownégò lopkù .po do dolmaczëniô. Serwis mô téż interfejs daleczéch wëwòłaniów òb protokół XMLRPC, co pòzwôlô na wëzwëskanié gò w bùtnowëch aplikacëjach. Letkò jidze dodac téż załóżkã do Firefoksa, chtërna ùmòżebniô szëkbã brëkùjąc tegò przezérnika.

Co slédnym czasã je ju zwëkòwą sprawą, je mòżlewòta sprôwdzania kaszëbsczéch dolmaczënków na starnie csb.open-tran.eu.

Part Kaszëbskò-Pòmòrsczégò Zrzëszeniô z Banina ògłosëł kònkùrs na nôbëlniészą mùltimediową prezentacëjã na jedną z wëbrónëch témów:

• snôżota mòłi tatczëznë Kaszëb (òdjimczi môlów + òpisë)
• pamiątczi Kaszëb (òdjimczi + òpisë)
• bëlni lëdzë w historëji Kaszëb
• karna spiéwającé w kaszëbsczim jãzëkù
• mòjé òkrãżé (gmina, kréz) - fòrma prowôdnika

Czasu je na to do kùńca łżëkwiôta, a sëma nôdgród sygnie 2000 złotëch.

Jesma czëkawi, kùli z nëch prezentacëjów mdze robiónëch w ôpen-zdrojowëch abò wòlnëch programach a kùli mdze wespółrobic z linuksowima systemama. Në żebë to dało jich jak nôwicy!

Rôczimë do ti zabawë!