Kaszëbsczi Linux ë Ôpen Ùdbë : linuxcsb.org

Mómë dlô waji dodóny artikel ò tim jak nastôwic kaszëbsczi jãzëk w Debianie Lenny z òkrãżã KDE.

Je to nôslédny przëmiôr na to, że naju robòta przë KDE je widzałô w corôz wicy distribùcëjów, a nié le blós w Kubuntu - co mòże pòmëszlëc czëtając wpisënczi na najich starnach .

Dzél pòmòcë do Linuksa bãdzemë pòmalińkù dofùlowiwac przidatnëma artiklama ë to nié le blós ò kaszëbsczich wersëjach. Jeżlë môta pëtania, czë téż pòmëslënczi na przëdatné artikle, to proszëmë te sélac do naju ze starnë łaczbë.

Czëtôjta: Kaszëbsczi jãzëk w Debian Lenny

Wkrôdła sã nama w kaszëbsczim dolmaczënkù Kubuntu widzałô zarô pò òtemkniãcô menu fela - ti co mają winstalowóną kaszëbską wersëjã na gwës ju dozdrzelë, że mómë czile tërerów na zôczątkù słowa “zjadłé” - jaką mòże równak kòżdi baro letkò sóm pòprawic.

1. Biéjta w menu do réżczi “mòwi nastôw”, a tam klëknijta prawą knapą mëszë na ten element
   
2. Wëbierzta z menu - jaczé wama terô wëskòknie - “Editëjë element”
   

(wicy…)

Mòże ju zamówic nowé wersëje pòpùlarnëch distribùcëjów Linuksa z rodzëznë Ubuntu. Platczi z Ubuntu, Ubuntu Server a téż Kubuntu z wersëją 8.04 LTS (òd Long Time Support - długòcządowé wspiarcé) zwóną téż Hardy Heron bãdą wësëłóné czilenôsce dniów pò premierze, chtërna je zabédowónô na 24 łżëkwiata.

Wiedno mòże téż zladowac a samemù wëpalic platkã z nowim systemã - na gwës mdze to wiele chùdzy jak żdónié na paczét. Dobrim wińdzenim je zôs aktualizacëjô do nowi wersëji brëkùjąc systemë aktualizacëji bënë swòji distribùcëji Ubuntu. Zainteresowónëch jak to zrobic òdsélómë do artiklów w najim serwisu a na gwës téż nie òstawimë bez òdpòwiescë problemów na jaczé mòże trafic brëkòwnik Linuksa.

Darmôk platczi mòże zamówic pòd adresama: shipit.ubuntu.com i shipit.kubuntu.org. Xubuntu a Gobuntu nie są przëstãpné w ramach akcëji ShipIt.

Òd zawczora mómë ju mòżnotã zapòznaniô sã z nowima wersëjama familëji Ubuntu : 8.04 - Hardy Heron. Wszëtkò wëzdrzi téż za tim, że je to nie le blós pierszô, le téż slédnô wersëjô Beta tegò wëdôwka. W przërównaniém do “Alfë” to nie dô bënë za wiele zjinaków, za to mómë na starnach dostóny fejn zestôwk zmianów w przërównaiém z wer. 7.10 - czëtôjta wicy tuwò: http://www.ubuntu.com/testing/hardy/beta .

(wicy…)

Wzérając nazôd na nen rok, mòżemë rzec, że ùdało sã nama dosc dalek z kaszëbsczim Linuksã dońc.
Cëż taczégò sã w tim rokù stało na tim pòlu?
A mùszimë Wama rzec, że wielë.

Naczniemë òd zgłoszony łoni kaszëbsczi klawiaturë. Na sta sã w rokù 2007 sztandardowim dzélã wszëtczich wiôldżich distribùcëjów (Debian, Fedora Core, Mandriva Linux, OpenSuse, Ubuntu…) ë to nié le Linuksa, bò je ju jã widzec n.p. w nowim FreeBSD 6.3 czë 7.x.

Z robòtą nad dolmacżënkã KDE jesma w maju do tegò doszłi, że pòkôza sã òficjalnô wersëjô 3.5.7 w maju 2007 téż ju do zladënkù. To przëniosło ze sobą weńdzenié z kaszëbsczim jãzëka do linuksowich distribùcëjów ë tak pierszą bëła Kubuntu 7.10 (przë jaczi téż robimë ekstra), krótkò pò ni przëszła OpenSuse 10.3 z kaszëbsczim bënë ë (òpiarti na Debianie) Sidux. Je to tak pò prôwdze przełomòwé wëdarzenié, bò pòkôza sã nama przez to w tim rokù pierszô kaszëbskô òperacjowô systema (z kaszëbską klawiaturą ë kaszëbsczim jãzëkã interfejsu) co je na gwës wôrt òdnotowac ë pòdsztrëchnąc.
Z dolamczënkã nowi wersëji KDE 4.0 jesma jak na dzysô ju tak dalek, że pòkôże sã òna na drëdżi rok w òficjajnëm wëdôwkù, co òtmëkô nama dzwiérze (a mòże barżi nie zamëkô tich przed nama) dlô kaszëbsczegò w nôslédnych wëdôwkach zakualnionëch do KDE 4.0 distribùcëjów Linuksa.

Mòże sã Wama wëdôwac to nie za wiôlgą robòtą, le ma mëszlimë, że jak na dwóch lëdzi co przë tim spòleczno robi je to dosc tëli ë ti prawie żëczą Wama (ë se téż ) wszëtczégò dobregò w Nowim 2008 Rokù!

Mark ë Michôł

Jak ma w czerwińcu pisôle nen articzel, to tej Kubuntu 7.10 nachôdôło sã jesz w rozwijowi wersëji ë generalno ë ni zamôdlëwôło sã ji do codniowegò brëkùnkù. Le terô jó to wëzdrzi jinaczi ë mòże smiało instalowac kùncową wersëjã ti distribùcëji. W ni to nachôdôja sã ju kaszëbsczé jãzëkòwé lopczi dlô KDE bënë ë mòże ji brëkòwac w kaszëbsczim jãzrkù jakno domëszlnym.

Przez to téż mómë przeniosłé całowny articzel ò instalacëji kaszëbsczégò jãzëka do dzélu ò kaszëbsczim Linukse:

• Kaszëbsczi jãzëk w Kubuntu 7.10

Rôczimë do czëtnictwa ë brëkùnkù Linuksa w naji rodny mòwie.

Mòże ju zladowac òd dzysô pierszą testową (Tribe 1) wersëjã wëdôwkù Ubuntu 7.10 - Gutsy Gibbon, jaczi bãdzë ùżëczony w kùńcowi wersëji w rujanie tegò rokù. Tribe 1 dôwô nama wëzdrzenié do tegò na co mòżemë lëczëc na jeseń (w Ubuntu mómë terô m.jin.: GNOME 2.19.2, Kernel 2.6.22-rc3, nową wersëjã X.org ë wiele wicy), nie bãdã sã równak terô ò tim pisôł, bò nie to wëdało mie sã na starnach kaszëbsczégò Linuksa nôwôżniszé.

Móm prawie Kubuntu 7.10 - Tribe 1 zainstalowóné ë widzã, że mòże terô bez problemów ùstôwic kaszëbską jãzëkòwą wersëjã dlô KDE !!!! – jaczé je ju w ti distribùcëji w nowim wëdôwkù 3.5.7 - jë to pò prôwdze terô dzecno prosté dzãka wëbierkòwi z lëstë.

Brëkòwac tich testowich wersëjów sã nié zamôdlëwô, chòc mùszã rzec, że mie to w niczëm nie przeszkôdzô, jeżlë widzã że móm pierszą òficjlaną òperacjową systemã pò prôwdze pò kaszëbskù (chòc jesz z felama) ë z kaszëbską klawiaturą. Terô przińdze mie jesz wama krótkò napisac ò tim jak mòże to òkrãżé ùstôwic, bë “gôdało” do naji w rodny mòwie. Ò tim to ju za sztërk (co ju rëchli jô ju wama przëòbiecôł).

• Zladënk Kubuntu Gutsy Gibbon Tribe 1

KDE w swòji nowi wersëji 3.5.7 je ju òd 22 maja na ftp-serwerach (ftp://ftp.kde.org/pub/kde/stable/3.5.7). Pierszą bëła wersëjô na Linuksa Mandriva, a pò ni przëszłë jinszé. Rozwijôrze tegò òkrãżô pòprôwilë fele m.jin. w Kadressbook, Korganizer a KMail dostôł czile nowich fùnkcëji dlô kòntów IMAP, pòprôwczi tikają sã téż n.p. PDF-przezérnika KPDF.

Le co dlô naju nôwôżniszé, to fakt tegò, że mómë ju bënë kaszëbską wersëjã, z czegò jakno karno dolmôczów jesma baro bùszni.

Në tej aktualizëjta swòjé wersëje KDE, jeżlë ju są òne ùżëczëwóné w nowi wersëji, wzérôjta za lopkama csb (czasã trza bãdze je gwës rãczno dodac) ë piszta nama swòjé bóczënczi co do fëlów/pòprôków w dolmaczënkù!!!

Terô nie le blós Kaszëbi czë Pòlôchë bãdą mògle dowiedzëc sã ò kaszëbsczim linukse, bò ùprzistãpnionô òsta do zladënkù anielskòjãzëkòwô wersëja 8 numeru Dragonia Magazine, w jaczim znôwa nalezc mòże wiadło ò najim dolmaczënkù.

Króm tegò artikla, są wszëtczé jaczé pòjôwiłë sã w pòlsczi wersëji. Le jednô sprawa jô bë zmienił - w przëtrôfkù niechtërnëch artiklów òbrôzczi bë mògłë bëc w anielskòjãzëkòwi wersëji a nie pò pòlskù. Chòc mëszlã, że to mòże taczé le szëkanié dzurë - pò prôwdzë to bëlny cządnik ë wôrt pòswiãc mù pôrã gòdzënów na czëtanié.

Fejn, że prawie dzãka taczim artiklom w różnëch dzélach swiata mòże ùczëc ò kaszëbiznie ë kaszëbsczich ùdbach.

Zladëjë numer: http://dragonia.pl/request.php?14

Dolmaczënk KDE 3.5 dotëgòwôł do sztërkù czej ju mòżnô bëło zgłosëc gò do òficjalnégò wëdôwkù. Jak mòże òbaczëc na starnie KDE (nalezë henë Kashubian), nót bëło przerëchtowac 2 lopczi w 100%, to je desktop_kdelibs.po ë desktop_l10n.po, jeden lopk w 90%, kdelibs.po ë 75% wiadłów z lopków z katalogù kdebase. Terô mdzemë mielë dbã, żebë do kùńca żëcégò KDE 3.5 wëdôwk kaszëbsczégò dolmaczënkù béł wiedno aktualizowóny. Wiedno nônowszé lopczi nelezëta w Kubuntu, czim téż sã òpiekùjema. Òd terô równak wikszi cësk mdzemë dôwôlë na robòtë nad wiadłama w nowim KDE, czëlë wersëji 4.0, chtërnô jesz w tim rokù mô bëc przistãpnô do zainstalowaniô (ju mòże testowac niechtërné aplikacëje).